Noticias

Para leerlo en castellano, queremos invitarle a utilizar el traductor neuronal que el Gobierno Vasco ha puesto al servicio de la ciudadanía: Aquí

El ayuntamiento dispone de versiones en castellano de sus publicaciones periódicas. Se pueden recibir pidiéndolo a la dirección: komunikazio@oiartzun.eus

2021eko errenta aitortzeko epearen irekiera dela eta (2022/04/04tik 2022/06/30era) Oiartzungo, Errenteriako, Lezoko eta Pasaiako udalek dei egin diete Oarsoaldeko zergadun guztiei errenta aitorpena euskaraz egiteko eta, bidenabar, Ogasunarekin harremana euskaraz izatera animatu dituzte herritarrak.

Pasai Donibanetik RKA aholkularitzaren aurrean eginiko agerraldian parte hartu dute RKA aholkularitza enpresako arduradun Maria Badiolak, Oiartzungo Hizkuntza Normalizazioko zinegotzi Josu Delgadok, Errenteriako Euskara zinegotzi Itziar Ostolazak, Pasaiako Euskara zinegotzi Loreto Osak eta Lezoko Ogasun zinegotzi Laura Martinezek. 

Errenta aitorpena euskaraz egiteko, Gipuzkoako Foru Ogasunetik bidalitako autolikidazio proposamena onartzeko orduan euskaraz egin dezakezu, baita aitorpena Internetez edo modu mekanizatuan Ogasunaren bulegoetan aurrez aurre egiten duzunean ere euskaraz egin nahi duzula hautatuz eta langileari adieraziz. Bestalde, errenta aitorpena egiteko gestoria bat erabiltzen bada, errenta aitorpena euskaraz egin eta Ogasunarekiko harremanetan euskara aukeratzeko borondatea adierazi daiteke.

Errenta aitorpena euskaraz egitea urrats bat gehiago da Ogasunarekin eta, azken batean, helburu izan behar duen administrazio publikoarekin harremanak euskaraz izateko bidean. Euskararentzako garrantzitsua da zure aukera, zuri gauza gutxi iruditu arren. Zorionez, urtez urte gero eta gehiago dira errenta euskaraz egiten duten Oarsoaldeko herritarrak eta administrazio publikoekin euskaraz egitea erabakitzen dutenak.

Oarsoaldeko lau udalek, Oarsoaldeko Euskara Batzordearen bitartez, bi lagunentzako otordu goxo bana zozkatuko dute herri bakoitzean errenta aitorpena euskaraz egiten duten zergadunen artean. Zozketan parte hartzeko hiru bide izango dira aukeran: whatsapp bidez zabalduko den drive bateko formularioa betetzea; www.oarsoarrak.eus webeko formularioa betetzea edota leku publikoetan jarriko diren boletoak bete eta entregatzea. 

Aurten ere egin, beraz, errenta aitorpena euskaraz! Agian saria eskuratu dezakezu eta!