Noticias

Para leerlo en castellano, queremos invitarle a utilizar el traductor neuronal que el Gobierno Vasco ha puesto al servicio de la ciudadanía: Aquí

El ayuntamiento dispone de versiones en castellano de sus publicaciones periódicas. Se pueden recibir pidiéndolo a la dirección: komunikazio@oiartzun.eus

Igandean jokatuko da, 12:00etan Madalensoron.

Igande eguerdian, Oiartzungo Malalensoro pilotalekuan, emakumeen esku pilotako Binakako Txapelketako final nagusia jokatuko da. Jaialdi ikusgarria izango da, eta ETBk zuzenean eskainiko du.

Aurkezpen ekitaldian Marta Pastor (Gipuzkoako Foru Aldundiko Kirol Zuzendaria), Aiako Harria Gaztelumendi (Oiartzungo alkateordea) eta Nora Velez del Burgo (Oiartzungo Berdintasun zinegotzia), Juan Mari Mitxelena (Euskadiko Euskal Pilota Federazioko presidente berria) eta Karmele Segura (Laboral Kutxaren babesletza arduraduna) izan dira. Guztiek emakumeen pilotaren gorakada nabarmendu dute, eta Madalensoron biziko den pilotazalegiro bikaina azpimarratu dute.

Aurtengo, Binakako Txapelketa berezia izan da, inoizko luzeena izanik. Abenduan hasi zen liga, eta lau hilabetez ligaxka bizia jokatu ondoren, Urrezko Liga berritzaileak eman zien jarraipena, Laudioko Aretoan jokatutako finalerdietara iritsi aurretik. Orain, azken txanpan, txapela nork jantziko duen igandean erabakiko da. Finalerako sailkatu diren bikoteak Arrizabalaga-Bergara eta Arraiza-Gaminde dira.

Olatz Arrizabalaga esku pilotaren historian Binakako sei Txapel eskuratu ditzakeen lehen pilotaria. Horretarako, ordea, ez du lan errazik izango, parean izango dituzten Arraiza-Gamindek erakutsia baitute edozeini irabazteko gai direla. 2022an, Arrizabalagak eta Gamindek elkarrekin irabazi zuten Binakako txapelketa Irunen, baina aurten aurkari izango dira. Arrizabalagak bost txapel irabaziak ditu dagoeneko, eta esperientzia handia du finaletan.

Lau pilotariek aurkezpenean adierazi dutenez, faborito argirik ez dago eta norgehiagoka fisikoki oso eskatzailea izango da. Arrizabalagak nabarmendu du finalak tentsio handia izango duela, eta partida gogorra espero duela, batez ere fisikoki.

Bestalde, Gamindek aitortu du Arrizabalaga-Bergara bikotea oso indartsua dela, baina bere bikotekidearekin batera, txapela eskuratzeko aukerak dituztela nabarmendu du. Finalerdietan erakutsi bezala, edozeini irabazteko gaitasuna badute, eta euren joko onena ematea izango da helburua.

Horixe da atzo Oiartzungo aurkezpenean izan ziren guztien nahia, pilotari bakoitza euren onena emateko gai izan dadila eta ikuskizuna apartekoa izan dadila.