Udal berriak

San Markoko 2017ko aurrekontuari auzi errekurtsoa jarriko zaio

Atzo, uztaileko ohiko udalbatzarrean, EH Bilduko Juan Inazio Ansa Martirena zinegotziak kargua utzi zuen. Ogasun arloaren ardura izan du legegintzaldi honetan. Jexux Leonet alkateak esker oneko hitzak izan zituen berarentzat: "Pena pixka batekin agurtzen zaitugu, baina eskerrak eman nahi dizkizugu agertutako konpromisoarengatik. Zortea izan da taldean gurekin izatea". Ansak berak ere esker oneko hitzak izan zituen EH Bilduko taldekideentzat ("ohorea izan da talde honetako parte izatea"), oposizioarentzat ("hitz egiteko eta akordioetarako jarrera izan duzue. Aurrekontuak ahobatez onartzea lortu izana oso pozgarria izan da niretzat") eta udal langileentzat.

Hutsik geratutako zinegotzi kargua EH Bilduren hautes-zerrendan hurrengoa izan zen Jon del Olmo Larrañagak beteko du, akreditazioa iristen denean. Ansak berarentzako ere hitzak izan zituen, "eskerrik asko, Jon, gaztea eta konprometitua izateagatik".

Lintziringo hirugarren fasean, Aldundiarekin elkarlana

Lintzirin eremuan zerbitzu-bide berriaren proiektua aurrera ateratzeko Gipuzkoako Foru Aldundiarekin hitzarmena egitea onartu zen atzo, ahobatez. Udalak bere gain hartu du lanen zati bat eta Aldundiak %54a finantzatzeko konpromisoa hartuko du. Leonetek azaldu zuenez, "bilera asko egin ditugu Aldundiko Errepide sailarekin. Orain arteko bi faseetarako ez dugu laguntzarik lortu, baina hurrengo faserako bai eta positiboa da hori".

Karla Lekuona futbol-zelaiko instalazioak beste sei urtez Oiartzun Kirol Elkarteari uztea ere onartu zen atzo. Dohainik utziko zaio, herrian futbola irabazi asmorik gabe sustatzen jarraitzeko.

San Markoko 2017ko aurrekontuak, auzitara

San Marko Mankomunitateko 2017ko aurrekontuei Administrazioarekiko auzi errekurtsoa jartzea ere onartu zen, EH Bilduren aldeko botoekin. Aurrekontu horietan udalek ordaindu beharreko tarifa kalkulatzeko moduak Oiartzuni kalte egiten dio. Erreklamazioa aurkeztu zuen lehenengo San Markon bertan, baina ez zaio onartu. 2014ko aurrekontuetako aurrekaria ere badago: epaitegiak arrazoia eman dio Oiartzungo Udalari (epaia ez da irmoa, San Markok errekurritu egin duelako).

Eneritz Arbelaitz San Markoko udal ordezkariak azaldu zuenez, "2014tik epaitegietara jo behar dugu legeak eta Europako zuzentarauek eskatzen dituzten neurriak betetzeko eskatzeko. Iazko azaroan San Markoko lehendakariarekin bildu ginen, lanketa egiteko prest. Ez dugu berri gehiago izan".

Puntu honetan EAJ abstenitu egin zen. Yon Goikoetxea zinegotziak adierazi zuenez, "ados gaude Udalaren irizpidearekin, oiartzuarrek ez lukete jasotzen ez dituzten zerbitzuengatik ordaindu behar eta egia da San Markoko irizpide batzuk Europako Batasuneko irizpideen kontrakoak direla, baina abstenitu egingo gara ahalegintxo bat egitea merezi duela uste dugulako".

Xanistebanek 97.000 €ko aurrekontua izango dute

Xanistebanetako egitaraua ere onartu zen atzo, ahobatez. Aurtengo festen aurrekontua 97.300 € pasatxokoa izango da. Leonet alkateak xanistebanetako Jai Batzordean parte hartu dute eragile eta taldeentzako esker oneko hitzak izan zituen.

Uztaileko protokolo gastua 297,12 € izan da, bidaia eta luntxetan.