Udal berriak

Herriko mugimendu feministak gaurko antolatutako elkarretaratzearekin bat egin du Udalak.

Euskal Herrian izan den azkeneko hilketa bikarioa salatu du Oiartzungo Udalak. Astelehenean Urbasan hilda aurkitu zuten haurra, aurten Euskal Herrian indarkeria bikarioz hildako lehen umea da, eta 2003tik hildako hamabigarrena. 2023an indarkeria matxistagatik eraildako 5 pertsona.

Oiartzungo Udalak, hilketa matxista gogor gaitzesteaz gain, gizarte parekide baten alde lanean jarraitzeko konpromisoa berretsi nahi du.

Era berean, Udalak bat egin du Oiartzungo Feministen Asanbladak gaur (azaroak 10) hilketa bikario hau salatzeko egingo duen elkarretaratzearekin (Done Eztebe plazan, 18:30tan) eta herritarrak ere euren gaitzespena adieraztera gonbidatu nahi ditu.

Udaletxeko balkoian indarkeria matxista salatzeko puntu morea jarrita dago.