Noticias

Para leerlo en castellano, queremos invitarle a utilizar el traductor neuronal que el Gobierno Vasco ha puesto al servicio de la ciudadanía: Aquí

El ayuntamiento dispone de versiones en castellano de sus publicaciones periódicas. Se pueden recibir pidiéndolo a la dirección: komunikazio@oiartzun.eus

Omenaldi hunkigarria egin diote gaur Maialen Oiartzabal Mendibil eskiatzaile akrobatikoari. Goi mailako kirol lehiaketetan izandako ibilbide oparoagatik aitortza egin nahi izan dio Udalak, herriko kirol elkarteetako ordezkariek eta hamarnaka adiskide eta herritarrek.

Edorta Fernandez Kirol zinegotziak eman dio IX. Kirol Saria, herri guztiaren izenean. Oiartzabalen ibilbide bikaina goraipatu du udal ordezkariak, eta bere kirol garaipenez gain, beste hainbat meritugatik ere saria jasotzeko arrazoiak dituela nabarmendu du. “Bere kirol ametsa betetzeko Andorrara joan zen emakumea da Maialen. Kirol minoritario batean, banakako kirolean, oztopo handiak gainditu ditu. Oiartzuarrontzat eta etorkizuneko belaunaldientzat kirolari emakume erreferentea bilakatu zara. Gaur, herriak saria eman dizu, baina zalantzarik gabe, zuk askoz gehiago eman diozu herriari”, esan du.

Hunkituta jaso du garaikurra Oiartzabalek. Esker oneko hitzak izan ditu udalarentzat, herriko kirol klubentzat eta ekitaldira hurbildu diren lagun eta herritarrentzat. Eski akrobatikoan hasi zenean ibilbide hau guztia egingo zuenik ez zuela espero aitortu du. “Guztiz eskertuta nago bizitako esperientziagatik, ikasitako guztiagatik eta ezagutu dudan jendeagatik”. Bereziki azpimarratu eta eskertu du etxekoengandik jaso duen babesa. “Oso zorioneko sentitzen naiz bide eder hau zuekin partekatzeko aukera izan dudalako. Mila esker”.