Udal berriak

Guztira, 287 farolatako argia aldatu da

Efizientzia energetikoa lortzeko, herriko bederatzi eremutan farolen argiak aldatu ditu aurten Udalak. Guztira, 287 farolatako argia aldatu da. Lan hauek egiteko, 60.000 €ko inbertsioa egin du Udalak. Gipuzkoako Foru Aldundiak 10.000 €ko laguntza emango dio Udalari.

Datorren astelehenean hasiko dira udal langileak azkeneko eremuan aldaketak egiten: Ugaldetxoko Igerobi bidean. Azken aste honetan, Karrikan eta Kontzejupe plazan egin dituzte argiteria aldaketak.

Urtean zehar, Iturriozko Ozentzio kalean; Elizaldeko Euskal Herria plazan, Kaskazuri plazan, Elorrondo kalean eta Doneztebe plazan; eta, Arraguako Makarraztegi poligonoan ere egin dira aldaketak.

Argiteria berritzearekin, Udalak energian eta ekonomian aurreztea lortuko du. 99 tona CO2 eta 11 tona petroleo gutxiago isuriko ditugu oiartzuarrok eta 9.000 € gutxiago ordaindu beharko dugu urtean argindarrarengatik.