Udal berriak

Herritarren eta eragileen iritziak eta gogoetak bilduko dira herriz herri

Duela gutxi arte, jaiak emakume eta gizonen berdintasunaren aldeko aldarrikapenerako lehentasunezko eremu izan ez badira ere, jakina denez, jaiak ospatzeko dugun modua gure jendartea antolatua dagoen moduaren eta ditugun balioen isla da. Komunitate gisa ditugun balio, nortasun, ideologia eta egiturak birsortzen dituzte jaiek, eta ditugun gatazkak, bote-harremanak, rol-banaketak, indarkeria-egoerak... adierazten dituzte.

Oarsoaldeko udalerrietan ere jaien testuinguruan emakumeen eta gizonen berdintasuna sustatzeko eta jarrera matxistak gaitzesteko ekimenak eta kanpainak egin dira, horietako batzuk modu bateratuan gainera, Berdintasunerako Mahai Teknikotik.

Dagoeneko egiten hasita dagoen bideari jarraipena emanez, Oarsoaldeko udalerrietan jai parekide eta barneratzaileagoak lortzeko egitasmo berria jarri dugu martxan. Egitasmoaren helburu nagusia Oarsoaldeko jaiak genero-ikuspegitik aztertzea da, eta indargune eta ahuleziak zein diren kontuan hartuta, jaiak parekideagoak eta barneratzaileagoak izan daitezen plangintza bat lantzea. Lan horiek egiteko prozesua abiatu dugu beraz, Elhuyar Aholkularitzaren laguntzarekin.

Lau udalerrietako hainbat jai izango dira aztergaiak, eta horiek izaera ezberdinetakoak izango dira, hau da, kulturarekin, gastronomiarekin, usadio paganoekin... lotutako jarduerak aztertuko ditugu. Azterketa horretan, Oarsoaldeko jaietan zeresana duten mota desberdinetako eragileak inplikatu nahi ditugu, errealitatea ongien beraiek ezagutzen dutelako. Azterketa egiteko beharrezkoa dugun informazioa iturri hauetatik eskuratuko dugu:

- Elkarrizketa sakonak eragile-mota desberdinetako ordezkariei: ordezkari politikoak, udal-teknikariak, kultur-elkarteak, elkarte gastronomikoak, kolektibo feministak...

- Azterketa dokumentala, jaiena zein horien komunikazioaren.

- Behaketa zuzena, festa zein dinamika jakinena.

Horrez gain, herritarren iritziak eta ekarpenak jasotzeko talde-gogoetak egingo ditugu udalerri bakoitzean, bertako eragile-mota desberdinekin. Lehenengo talde-gogoetan data irailaren bukaeran izango da Oiartzunen.

Gaiarekin interesa duen herritar, eragile eta elkarte oro ongietorria izango da prozesu honetara. Datozen aste eta hilabeteetan zehar prozesuaren eta bilera-deialdien inguruko xehetasun gehiago ematen joango gara; baina edozein zalantza argitzeko, udaletako Berdintasun asilekin jar zaitezkete harremanetan:

Oiartzungo Udaleko Gizarte Zerbitzuak: 943 49 05 52